Командантот на вооружените сили на Боливија, Вилијамс Калиман, изјави дека војската побарала претседателот Ево Моралес да поднесе оставка, за да помогне во обезбедувањето стабилноста во државата.
„Откако го анализиравме внатрешниот конфликт во земјата, го замоливме претседателот да се откаже од претседателскиот мандат, со цел да се врати мирот и да се одржи стабилноста во корист на Боливија“, рече Калиман пред новинарите.
Боливиските вооружени сили претходно соопштија дека наредиле воздушни и копнени операции да ги „неутрализираат“ вооружените групи што работат надвор од законот.
Протестите и немирите во Боливија започнаа по изборите кон крајот на октомври, на кои победи Ево Моралес, а во немирите досега се убиени три лица, со повеќе од 300 повредени.
Организацијата на американските држави (ОАС) соопшти дека ревизијата утврдила дека имало нерегуларности на изборите, а порано денеска Моралес се согласи да се одржат нови избори и да се заменат членовите на изборната комисија.