Силниот снег и мразот во вторник, предизвикаа верижен судар на автопатот западно од Виена, во кој учествуваа дури 100 возила, а во несреќата најмалку едно лице загина, јавуваат австриските медиуми.
Официјални лица од службите за спасување соопштија дека несреќата се случила во близина на местото Санкт Полтен на околу 60 километри од Виена, и дека се вклучени 40 камиони и 60 автомобили, пренесува БиБиСи. Тие наведуваат дека колоната на запрени возила е подолга од два километри.
На местото на судирот дошла помош од шест регионални противпожарни служби, со возила на итната помош и хеликоптер за итни случаи, објави австриската телевизија ОРФ.
Во јужна Австрија, најмалку 29 лица се повредени, шест од нив сериозно во две сообраќајни несреќи во тунелите на патот во Штаерска, јави ОРФ.
Ладниот бран предизвика пореметувања во сообраќајот ширум Европа.