18-годишна девојка е убиена, а шестмина се ранети во пукање на роденденска забава во Северна Калифорнија, соопшти денеска полицијата.
Пукањето се случи за време на роденденската забава на 19-годишно момче во дом во Антиохија, на околу 70 километри североисточно од Сан Франциско, а одговорните за насилството побегнаа пред да дојде полицијата и никој не беше уапсен, пренесе АП.
Се наведува дека некои од жртвите биле пренесени во локалните болници по „паниката во која луѓето бегале во повеќе насоки“.
По пукањето 18-годишната девојка била пренесена во болница, каде починала.
Меѓу ранетите гости имало четири жени на возраст од 19 и 20 години, како и двајца мажи на возраст меѓу 18 и 19 години, соопшти полицијата. Нивните повреди не биле опасни по живот.