Претставник на армијата на Бурунди попладнево информира дека во трите вчерашни напади врз воените објекти во близина на главниот град Бужумбура биле убиени 87 лица, пренесоа американските медиуми.
Меѓу убиените има осум лица од безбедносните сили, а во борбите се ранети уште 21 војник. Уапсени се 45 лица, припадници на непознатата група која ги извршила нападите.
Жителите на главниот град Бужумбура изјавуваат дека силите за безбедност ги претресувале куќите, од нив насила ги ваделе луѓето и ги застрелувале, а некои од убиените биле со врзани раце на грбот.
Портпаролот на армијата полковникот Гаспар Баратуза вчера информира дека армијата на Бурунди ги одбила нападите врз трите воени бази, извршени од група вооружени мажи, кои имале за цел да украдат оружје и да ослободат затвореници.
Насилството во Бурунди се поврзува со незадоволството од спорниот трет мандат на претседателот Пјер Нкурунзиза, кој според многумина Бурундијци и меѓународната заедница е неуставен.