Турскиот, рускиот и сирискиот министер за одбрана, Хулуси Акар, Сергеј Шојгу и Али Махмуд Абас денеска одржаа состанок во Москва на кој се договорија да продолжат со трилатералните средби за да се обезбеди стабилност во Сирија и поширокиот регион.
Турското Министерство за одбрана соопшти дека на состанокот, одржан во „конструктивна атмосфера“, беше договорено да се продолжи „форматот на трилатерални состаноци за обезбедување и одржување на стабилноста во Сирија и регионот во целина“. Разговарано е за „сириската криза, бегалското прашање и заедничките напори за борба против сите терористички групи во Сирија“.
Според агенцијата Анадолија, покрај министрите, на состанокот учествуваа и шефовите на разузнавачките служби на трите земји.
Фото: Анадолија
Извор: МИА