Египетското Министерство за внатрешни работи денеска соопшти дека е убиен еден од лидерите на Муслиманско братство, Мохамед Камал, како и неговиот помошник Јасер Шехат.
Камал беше надлежен за „вооруженото крило“ на организацијата.
Камал и Шехат се убиени во стан во јужниот кварт на Каиро, Басатен.
Египетскиот претседател Абдел Фатах ал Сиси покрена жестока кампања против исламистите откако во 2013 година го собори од власт претседателот Мохамед Морси, кој беше од редовите на Муслиманско братство.
Египетските сили имаат елиминирано стотици следбеници на Муслиманско братство, а илјадници се уапсени и осудени на смрт во масовни судења, кои беа осудени од групите за заштита на човековите права.