Во два одделни напади врз два кафе-бара во Гвадалахара убиени се четири лица, меѓу кои и еден Американец, додека 16 се повредени, соопштија денес официјални лица.
Двајца мажи се убиени, а девет се повредени минатата ноќ во западниот град Гвадалахара, откако вооружен напаѓач влегол во барот, додека гостите гледале фудбалски натпревар.
Една од жртвите е американски државјанин, јавија локалните медиуми, иако американскиот конзулат, како и локалното обвинителство не ја потврдија оваа информација.
Неколку моменти по првиот напад, напаѓачи фрлиле граната во друг бар, каде што е убиен 28-годишниот келнер и уште еден млад човек, додека седум лица се повредени, пренесе АФП.
Гвадалахара е главен град на мексиканската сојузна држава Халиско. Се наоѓа на западната висорамнина, на околу 500 километри западно од главниот град на Мексико.