Премиерите на земјите од Вишеградската група, денеска, на вонредна онлајн средба, ја поддржаа Чешка во нејзината дипломатска војна со Русија во врска со аферата и новите откритија и основаните сомневања дека руски агенти учествувале во експлозијата на муниција во Врбјетице во јужна Чешка во 2014 година.
„Ние, премиерите на Полска, Унгарија и Словачка, изразуваме целосна солидарност со Чешката Република во врска со учеството на руските воени разузнавачки агенти во експлозијата во складиштето за муниција во Врбјетице. Го осудуваме овој акт на агресија и кршењето на меѓународното право од страна на Русија на европско тло“, стои во декларацијата на премиерите на Вишеградската четворка по денешната средба.
Унгарија, Словачка и Полска во декларацијата го осудуваат непропорционалното протерување на 20 чешки дипломати од Москва како одговор на, според премиерите, сосема разбирливото протерување на 18 руски агенти на ГРУ и СВР од руската амбасада во Прага на 17 април поради Афера Врбјетица, пренесува Бета.
Премиерите понудија дипломатска и конзуларна поддршка и помош на чешкиот премиер Андреј Бабиш, откако амбасадата на Чешка во Русија остана со само седум дипломати и 25 административни службеници.
„Заедно со чешкиот премиер, ги осудуваме незаконските и брутални активности на руското разузнавање. Нема да дозволиме ова да предизвика поделби во Европа. Земјите од Вишеградската група се решени да преземат мерки заедно со другите земји-членки на ЕУ за зајакнување на нашата отпорност“, се посочува во деларацијата на претседателите на владите на земјите од В4. ссм/