Поранешниот унгарски премиер Виктор Орбан, кој беше соборен по 16 години на власт на изборите во април, ги повика своите поддржувачи да ја вратат демократијата во земјата за која рече дека е „уништена од новата влада“.
Во својата прва силна политичка изјава по неговиот убедлив изборен пораз, Орбан објави „Изјава за отпор“ на Фејсбук кратко откако неговата партија Фидес соопшти дека обвинителите извршиле рации во канцелариите каде што се сместени нејзините интернет сервери.
Обвинителите во одговор испратен по е-пошта за Ројтерс изјавија дека рациите се поврзани со истрага за „проневера и други кривични дела“ во Националниот фонд за култура под владата на Орбан.
Лидерот на Фидес им рече на новинарите дека обвинителите заплениле сервери што ја содржат базата на податоци и е-поштата на партијата, во она што тој го нарече политички мотивиран потег за законско блокирање на работењето на Фидес.
„Проблемот со Националниот фонд за култура беше само изговор за ова“, рече Орбан, додавајќи дека немало нелегално дејство.
Во објава на Фејсбук, Орбан рече дека Унгарија „престанала да биде демократска држава“ откако новата централно-десничарска влада на премиерот Петер Маѓар усвои уставен амандман со кој се завршуваат мандатите на претседателот и на претседателот на Уставниот суд. Поранешниот шеф на државата Тамаш Шулок, под притисок од новата влада, го потпиша амандманот и поднесе оставка.
Сепак, Тиса негира дека зазема авторитарен став кон политичките противници. Новата владејачка партија вети дека ќе ја ограничи корупцијата, за која вели дека била „раширена“ под Орбан, како дел од напорите на Тиса да ја врати Унгарија во мејнстримот на ЕУ.
Самиот Орбан се соочи со жестоки критики за демократските стандарди на Унгарија за време на неговиот мандат и честопати се судираше со Брисел за прашања како што се владеењето на правото и правата на малцинствата.
Орбан ги негираше обвинувањата за корупција.
„Новиот политички систем создаден на овој начин е нелегитимен. Фидес ќе ги употреби сите мирни средства против злоупотреба на моќта во и надвор од парламентот“, рече тој.
Тиса има големо мнозинство во парламентот, што ѝ овозможува да ги поништи промените воведени од Орбан за кои Петер Маѓар вели дека ја оштетиле демократијата.