Виетнам упати официјален протест поради однесувањето на кинеските воени бродови кои го контролираат подрачјето во спорниот дел на Јужното Кинеско Море, каде што Кинезите започнаа со поставување на нафтени платформи.
Според соопштението на виетнамското Министерство за надворешни работи, кинески воен брод се доближил само на 200 метри до неколку рибарски бродови од Виетнам и видливо ги насочил топовите и митралезите кон нив.
Инцидентот го потврдил и новинар на јапонскиот весник „Јомиури Шимбун“, кој настанот го следел од брод на виетнамската крајбрежна стража. Според јапонскиот новинар, во блиската средба со виетнамскиот брод учествувале шест кинески воени бродови.