Министерот за одбрана на Полска, Владислав Косињак-Камиш, објави дека во оваа земја пристигнал специфичен авион што го користат силите на НАТО и дека првпат ќе извршува операции од територијата на Полска.
Според министерот, во оваа земја пристигнал специјализиран авион за рано предупредување и команда E-7 Wedgetail, кој припаѓа на австралиските воздухопловни сили.
Ова е првпат овој авион да ја посети Полска, а тоа е особено значајно бидејќи е наменет не само за поддршка на операциите на НАТО, туку и за помош на Украина.
„Во текот на наредните недели, авионот за рано предупредување и команда E-7A Wedgetail на Кралските австралиски воздухопловни сили ќе дејствува од 32-та тактичка воздухопловна база во Ласк. Екипажите на E-7A ќе ја поддржат заштитата на воздушниот простор на НАТО и координацијата на воздушните операции на источниот дел од алијансата. Ова е првата мисија на E-7A спроведена од полска територија. Авионот, опремен со напреден MESA радар, обезбедува 24/7 надзор и поддршка на тактичката авијација на сојузничките операции“, изјави министерот.
Е-7 Wedgetail влезе во употреба со австралиските воздухопловни сили во 2012 година и е пренаменет Боинг 737.
Тоа е авион за рано предупредување и контрола од воздух (AEW&C). Што се однесува до поддршката на Киев, се очекува австралискиот авион да го прави тоа со следење на воздушниот простор и откривање на руски авиони, ракети и други воздушни закани.
Овој тип авиони може да ги поддржува и украинските ловци, на пример, со посочување на нападните цели. Е-7 може да спроведува и електронски извидувачки операции, собирајќи такви информации од растојание до 850 км. Ова значи дека тие ќе можат да го следат регионот Калининград, како и руските региони во близина на украинската граница и активните делови од фронтот.
Накратко, благодарение на операцијата на Е-7, Украина треба да добие непроценлива информативна поддршка, што треба да ѝ овозможи уште подобро да ги координира своите одбранбени и офанзивни операции.