Актуелниот американски претседател Доналд Трамп зборуваше за војната во Украина за време на интервјуто за ABC News емитувано синоќа.
Во интервјуто, кое се фокусираше на првите 100 дена од новиот мандат на Трамп, водителот го праша за неговите спротивставени ставови за мировните преговори.
Пред неколку дена Трамп на социјалната мрежа Truth Social напиша дека е можно Путин да го „влече за нос“ кога се во прашање преговорите. Трамп го даде коментарот веднаш по средбата со украинскиот претседател Володимир Зеленски во Ватикан на 26 април. „Нема причина Путин да истрела проектили врз цивилни области, градови и села во последните денови“, напиша Трамп тогаш.
„Затоа мислам дека можеби тој воопшто не сака да ја заврши војната, туку само ме завлекува и можеби треба да му се изврши поинаков притисок, со банкарски или секундарни санкции? Трамп додаде во објавата.
На прашањето на новинарот на Еј-Би-Си Њуз дали мисли дека Путин ги запира преговорите, Трамп одговори: „Можно е. Можеби ќе ме закочи малку, но би рекол дека сепак би сакал да ја прекине војната“, рече Трамп за време на интервјуто. И покрај неговите сомнежи, тој подоцна во разговорот рече: „Мислам дека сака мир, да. Мислам дека навистина го сака тоа“.
Трамп, кој претходно вети дека ќе преговара за мир во Украина во рок од 100 дена по враќањето на власт, неодамна стана сè пофрустриран од, како што тврди, неподготвеноста на Москва да стави крај на војната, која трае веќе три години.
Американските власти нагласија дека оваа недела ќе биде клучна за одлучување за континуираното вклучување на САД во мировните напори, во време кога расте незадоволството на Трамп.
На 28 април Путин објави тридневен прекин на огнот од 8 до 11 мај по повод 80-годишнината од советската победа над нацистичка Германија, што специјалниот пратеник на Трамп, Кит Келог, го нарече „апсурдно“.
На прашањето дали му верува на Путин, Трамп избегна јасен одговор и во жестока размена со новинарот рече: „Не им верувам на многу луѓе. И јас не ви верувам“.
„Путин сонуваше да ја преземе целата земја. Мислам дека нема да му дозволам да го направи тоа“, заклучи Трамп.
Иако преговорите се уште се во тек, руските сили ги засилија нападите во последните недели, вклучително и во регионот Суми. За време на претходниот тридневен Велигденски прекин на огнот, меѓу 19 и 21 април, Зеленски ја обвини Москва за речиси 3.000 прекршувања на примирјето.