Стотина луѓе се повредени, а најмалку петмина загинати во голема експлозија во фабрика за вештачко ѓубриво во американската држава Тексас, јавија американски телевизии, но се стравува дека бројот на жртви ќе биде многу голем.
Во експлозијата што се случи во фабрика во гратчето Вест, стотина километри јужно од Далас, а чија причина се уште не е позната, уништени се голем број домови како и еден дом за стари и изнемоштени лица.
Американски медиуми јавуваат за пет загинати, но постои стравување дека бројот на жртви ќе биде „многу, многу поголем“.
Локалната телевизија КХХВ, огранок на Си-Би-Ес, јави дека се стравува оти бројот на жртви може да биде 70 меѓу кои петмина пожарникари и еден полицаец.
Властите побараа евакуација во очекување на нова можна експлозија во фабриката како и заради отровните гасови што се шират низ воздухот.
Портпарол на Одделението за јавна безбедност на Тексас изјави дека веројатно се работи за „стотина повредени“ и уништени голем број домови. Според него, во урнатини од дом за стари и изнемоштени лица евакуирани се повеќе од 130 луѓе, но под урнатините има лица кои не успеале да бидат спасени.
Во локалната болница примени се 66 луѓе од кои 12 во критична состојба. Бидејќи во локалната болница нема доволно места, голем број луѓе прва помош добиле на рагби игралиште на средното училиште во Вест.
Телевизии од хеликоптер прикажуваат инсерти на кои се гледаат голем број луѓе на теренот и пред училиштето. Гувернерот на Тексас, Рик Пери изјави дека државата ги ангажирала сите свои ресурси со кои им помага на локалните власти каде се случи катастрофата.