Унгарскиот премиер Виктор Орбан изјави дека 21 век ќе биде „век на понижување за Европа“, оценувајќи дека континентот за првпат од индустриската револуција е надвор од клучните светски промени. Тој ова го изјави на својот годишен говор во будимпештанскиот Варкерт Базар.
Орбан се осврна на својот говор од минатата година, кога тврдеше дека унгарската влада, како сојузник на американскиот претседател Доналд Трамп, ќе биде на „главната улица на историјата“. Според него, револуцијата што Трамп ја предводел против либералните елити се остварува, а Унгарија ѝ се приклучила.
📄 A report by @JudiciaryGOP reveals Brusselian censorship and election interference across Europe. Fake NGOs, journalists bought off, manipulated algorithms, euro millions pumped into subversive schemes. This is the real threat to freedom, to the sovereign will of the people,… pic.twitter.com/7gsmqiCxhW
— Orbán Viktor (@PM_ViktorOrban) February 15, 2026
Тој ја критикуваше Европската унија, тврдејќи дека „репресивната машина на Брисел“ сè уште делува во Унгарија. Орбан обвини дека во земјата функционираат „маскирани организации на граѓанското општество, купени новинари и политичари“, финансирани од Брисел, и најави дека по изборите ќе работи на нивно „чистење“.
Во говорот ги истакна и социјалните мерки воведени пред изборите во 2026 година, наведувајќи дека тие се финансираат преку посебни даноци за големите компании. Според него, оние што ја ценат слободата треба да се плашат од Брисел, а не од Истокот.
Орбан се повика и на американски извештај според кој Европската комисија наводно вршела притисок врз социјалните мрежи за цензурирање содржини, вклучително и за време на изборни процеси во Романија и Молдавија. Тој оцени дека американското пријателство е важно бидејќи, според него, САД ја разоткриваат цензурата во ЕУ.
Осврнувајќи се на опозициската партија Тиса и нејзините кадровски решенија, Орбан ги критикуваше врските на нејзини претставници со меѓународни компании и банки. Тој тврдеше дека енергетската компанија „Шел“ профитирала од војната и има интерес да ја оддалечи Унгарија од рускиот гас, додека за „Ерсте банка“ рече дека сака да влијае врз идната економска политика преку свои луѓе.
Унгарскиот премиер предупреди дека Европа се движи кон војна до 2030 година и дека претстојните избори ќе бидат „последни пред војната“. Според него, ЕУ се вооружува и подготвува населението за можен конфликт, додека на Украина ѝ доделува значителни финансиски средства.
Орбан повтори дека Унгарија нема да испраќа пари или оружје во Украина и дека унгарските војници нема да бидат испратени во конфликтот.