Советникот на министерот за внатрешни работи на Украина, Антон Герашченко, објави ново видео на кое тој тврди дека го прикажува моментот на ракетен напад врз центарот на Чернихив.
Најмалку седум лица загинаа, а 90 се повредени во руски ракетен напад на централниот плоштад во северниот украински град Чернихив, соопшти украинското Министерство за внатрешни работи. Луѓето оделе во црква по повод празникот кога се случил нападот, соопшти Министерството, додавајќи дека меѓу загинатите има и 6-годишно дете, а 12 деца се повредени.
„Руската ракета директно го погоди центарот на градот, во нашиот Чернихив. Плоштадот, Политехничкиот универзитет, театарот“, објави на Telegram украинскиот претседател Володимир Зеленски, кој е во работна посета на Шведска. „Обична сабота која Русите ја претворија во ден на болка и загуба.
Чернихив е град на зелени булевари и вековни цркви на околу 145 километри северно од главниот град Киев. МВР соопшти дека во нападот бил уништен покривот на драмскиот театар.