Помина една недела откако Иран го именуваше Моџтаба Хамнеи за свој нов врховен лидер, а јавноста сè уште не го видела.
Сепак, некои аналитичари велат дека неговата видливост како врховен лидер не е важна, туку кохезијата на институциите под него.
Моќните безбедносни сили како Корпусот на Исламската револуционерна гарда (ИРГЦ) веројатно ќе ја насочуваат воената стратегија на Иран, без оглед на присуството на Хамнеи, објавува CNN.
ИРГЦ е елитна гранка на вооружените сили на Иран, основана по иранската револуција во 1979 година како паралелна безбедносна институција покрај националната армија. Целта на единицата беше да ја заштити револуционерната влада и нејзините лидери, иако со текот на времето порасна до ниво на длабока држава помоќна од самата војска, со огромна бизнис империја.
Командантот на Револуционерната гарда директно му одговара на врховниот лидер. ИРГЦ има силно влијание врз домашната политика и економијата, со интереси што се протегаат до градежништвото, телекомуникациите, автомобилската и енергетската индустрија и пошироко.
Во 2009 година, нејзината подгрупа Басиџ ги задуши антивладините демонстрации и помогна да се обезбеди позицијата на тогашниот тврдокорен претседател Махмуд Ахмадинеџад.
Американскиот претседател Доналд Трамп изјави дека не е сигурен дали новиот врховен лидер на Иран, Моџтаба Хамнеи, е воопшто жив по нападите меѓу САД и Израел.
Во разговор за NBC News, Трамп рече дека нема потврда за неговата состојба.
„Не знам дали е воопшто жив. Досега никој не можел да го покаже. Слушнав дека не е жив, а ако е, треба да направи нешто многу паметно за својата земја – да се предаде. Некои мислат дека е жив, но многу тешко ранет“, рече Трамп.
Еден ден претходно, американскиот министер за одбрана Пит Хегсет изјави дека врховниот лидер веројатно бил „онеспособен“ откако бил ранет во нападите меѓу САД и Израел.
Доналд Трамп официјално ја означи ИРГК за терористичка група во 2019 година. Врховниот совет за национална безбедност на Иран последователно ги означи САД како „државен спонзор на тероризмот“, а американските трупи што дејствуваат во регионот како „терористички групи“, според ИРНА, државниот медиум на Иран.
Сојузниците на САД во регионот, исто така, ја сметаат Револуционерната гарда за голема безбедносна закана – Бахреин и Саудиска Арабија ја додадоа ИРГК на своите листи на терористички организации во 2018 година. Европската унија ја означи групата како терористичка организација оваа година откако Иран насилно ги потисна антивладините протести.