Вработените во американската царинска служба на аеродромот Џон Ф. Кенеди уапсија 22-годишен кримчар кој се обидел да пренесе повеќе од 18 килограми кокаин скриен во пакети со замрзнати ракчиња.
Захари Скот е американски државјанин кој живее во Гвајана и бил избран по случаен избор од царинските службеници за дополнително пребарување откако пристигнал со лет од јужноамериканската земја. Пребарувајќи низ багажот на Скот, полицајците пронашле расфрлана облека и неколку пакувања со замрзнати кралски ракчиња.
Откако ги отвориле спакуваните деликатеси од морска храна, откриле парчиња бел прав за кој подоцна било утврдено дека е кокаин, се наведува во судските документи. Вкупната тежина на кокаинот била 18,45 килограми.
При апсењето Скот наводно изјавил дека „знаел дека не е во ред да се донесат пакетите во Соединетите Држави“, велејќи им на инспекторите дека требало да биде платен помеѓу 5.000 и 6.000 долари за оваа шверцерска работа. Доколку биде прогласен за виновен, на Скот му се заканува затворска казна до 20 години.