Мирните протести во кои учествуваа неколку илјади демонстранти во Рио де Женеиро, во знак на поддршка на учителите кои бараат повисоки плати, прераснаа во насилство, па маскирани анархисти палеле оган и се обиделе на сила да влезат во градското собрание.
По неколку часовни мирни протести, најмалку 200 маскирани анархисти оштетиле неколку објекти, меѓу кои и банки и се обиделе да ограбат автомати со пари, по што запалиле и оган на неколку места.
Запален е и еден автобус на авенијата Рио Бранко, а демонстрантите изнеле и мебел од неколку банки и го употребиле како барикади против полицијата, која што била принудена да употреби солзавец, за да ја растури насобраната маса.
-Кога нема полиција, нема ниту насилство. Кога тие ќе дојдат тогаш и тоа почнува, рече анархистот Хуго Криос.
-Јас сум подготвен, не им верувам, изјави дваесет и тригодишниот демонстрант за „Франс прес“.
Организаторите на демонстрациите велат дека околу 50.000 луѓе учествувале во протестот, додека полицијата тврди дека биле околу 10.000.
Елена Георгиевска