Четири лица се повредени откако маж со секира и чекан ги нападна гостите во неколку кинески ресторани во Оукланд, Нов Зеланд. На видео објавено на социјалните мрежи се гледа како луѓе бегаат, откако напаѓачот влезе во објектите и почна да ги напаѓа гостите.
Сведоците рекоа дека мажот имал и голем број други оружја, вклучително и „нешто што личи на чекан“. Полицијата соопшти дека на местото на настанот е уапсен еден кинески државјанин кој е обвинет за нанесување тешка телесна повреда.
Властите не го соопштуваат идентитетот на напаѓачот или неговата возраст. Полицијата вели дека нападот најверојатно не е расно мотивиран и во моментов се третира како изолиран инцидент. Полицијата извести дека четири лица се повредени, а тројца од нив завршиле во болница и дека се стабилни.
Нападите се случија во рестораните Zhangliang Malatang, Yues Dumpling Kitchen и Maya Hotpot. Еден вработен рече дека инцидентот започнал неочекувано и дека човекот само „влегол внатре, извадил предмет налик на чекан и ги нападнал луѓето што седеле на маса“.
Готвач во еден од рестораните рече дека сè изгледа „како воена зона“: „Таму имаше млада личност на околу 20-ти години, со крвава глава. Стоеше некое време, а потоа се струполи на подот“.
Еден од сведоците изјави дека напаѓачот и пришол на една девојка одзади и ја удрил со секира по глава.