Републиканските сојузници на новоизбраниот американски претседател Доналд Трамп вчера во Претставничкиот дом на американскиот Конгрес доставија нацрт-закон со кој се одобруваат преговорите за купување на Гренланд, барајќи поширока поддршка за законот.
Предлог-законот се нарекува Гренланд повторно да биде голем, потврдено од канцелариите на републиканецот Енди Оглс, кој е автор на законот, и неговата колешка Дајан Харшбаргер. Копија од нацртот претходно беше објавена од Fox News Digital, а до понеделник наутро десет републикански пратеници го поддржаа.
Трамп претходно изјави дека сака да го направи Гренланд дел од Соединетите држави и не ја отфрли можноста да користи воена или економска моќ за да ја убеди Данска да ја предаде. Републиканците освоија тесно мнозинство во Претставничкиот дом и Сенатот на американските избори на 5-ти ноември.
Trump just said that he may declare war on Denmark to take Greenland.
“It might be that you'll have to do something.” pic.twitter.com/gSIlrsd6rV
— No Lie with Brian Tyler Cohen (@NoLieWithBTC) January 7, 2025
Предлог-законот, доколку биде усвоен, ќе му овозможи на Трамп да влезе во преговори со Данска на 20 јануари, кога ќе ја преземе функцијата претседател.
„Конгресот со ова го овластува претседателот, почнувајќи од 12:01 часот по источно стандардно време на 20 јануари 2025 година, да се обиде да влезе во преговори со Кралството Данска за да обезбеди стекнување на Гренланд“, се наведува во законот.
Гренланд е под данска контрола со векови, прво како колонија, а сега како полусуверена територија под Данското кралство. Подлежи на данскиот устав, што значи дека за секоја промена на неговиот правен статус ќе бидат потребни уставни амандмани.
Гренландскиот премиер Муте Егеде, кој претходно се залагаше за независност на островот, изјави дека островот не е на продажба и дека граѓаните треба да одлучат за нивната иднина.