Името на Вадим Красиков неколкупати се појави во последните недели во врска со потенцијалната размена на затвореници меѓу Русија и западните земји. Соработниците на рускиот опозициски лидер Алексеј Навални вчера објавија дека непосредно пред смртта на Алексеј се воделе преговори за негова размена за Русин затворен во Германија.
Тој руски затвореник бил Красиков. Според Марија Певчик, една од најблиските соработници на Навални, тој и двајцата американски државјани приведени во Русија требало да бидат разменети за Красиков. Нејзините тврдења не можеа да бидат независно проверени и таа не понуди докази за да ги поддржи.
Претходно овој месец, рускиот претседател Владимир Путин во интервју со поранешниот водител на „Фокс њуз“, Такер Карлсон, имплицираше дека новинарот на „Волстрит журнал“, Еван Гершкович, приведен во Русија под обвинение за шпионажа, може да биде замена за Красиков.
Иако Путин не го идентификуваше по име, генерално се разбира дека рускиот „патриот“ за кој рече дека отслужува доживотна казна за „ликвидација на бандити“ во „една од европските престолнини“ е Красиков, пишува Асошиејтед прес.
Красиков отслужува доживотна казна затвор во Германија за убиството на Зелимхан „Торнике“ Кангошвили во Берлин во 2019 година, грузиски државјанин со чеченско потекло, кој се борел против руските војници во Чеченија, а подоцна побарал азил во Германија.
Красиков беше осуден во 2021 година. Германските судии рекоа дека тој дејствувал по налог на руските власти, кои му дале лажен идентитет, пасош и средства за да го изврши убиството. Убиството и последователното осудување предизвикаа голем дипломатски спор меѓу Русија и Германија, вклучително и дипломатски протерувања.
Доказите разгледани од судот, вклучително и материјалот откриен од истражниот сајт Белингкет, покажаа дека Красиков бил вработен во руска безбедносна агенција и најверојатно од него било побарано да го изврши убиството во 2019 година, рече судијата Олаф Арнолди.
Красиков и неговите правни застапници ја оспорија неговата вина за убиството, па дури и го доведуваа во прашање неговиот идентитет. Красиков на почетокот на судењето рече дека е погрешно идентификуван и дека е роден во Русија во 1970 година, а не во Казахстан во 1965 година.
Сведоците го виделе осомничениот како фрла велосипед, пиштол и долга, темна перика во блиската река Спре и ја известиле полицијата, која брзо го уапсила пред да може да побегне со електричен скутер. Портпаролот на Кремљ, Дмитриј Песков, ги нарече „апсолутно неосновани“ обвинувањата за руска вмешаност во убиството во Берлин.
Според Bellingcat, Красиков е роден во 1965 година во денешен Казахстан, тогаш дел од Советскиот Сојуз. Bellingcat тврди дека Красиков работел за ФСБ, службата за државна безбедност на Русија. Арнолди истакна дека Красиков бил женет двапати и бил татко на три деца.
Арнолди додаде дека Красиков немал претходни пресуди, но официјалните записи покажуваат дека руските власти го барале за убиство на бизнисмен во Москва во 2013 година. Случајот беше отфрлен во 2015 година.