Државните медиуми во Северна Кореја пред неколку месеци постојано известуваа за егзекуцијата на тетинот на лидерот на државата, Ким Џонг Ун.
Меѓутоа американскиот кошаркар Денис Родман, кој неколку пати уживаше во Северна Кореја во друштво на врховниот командант на Северна Кореја, тврди дека тетинот на Ким, Џанг Сонг Тек (67) е жив и здрав.
Во интервју за списанието „DuJour”, Родман вели дека во тек на последната посета на Ким, која се случи по веста за големата чистка на тетинот и неговите соработници, во Пјонгјанг стоел покрај живиот тетин.
-Можете да кажете што било за Северна Кореја и луѓето ќе поверуваат во тоа. Последен пат кога бев таму, се зборуваше дека ја убил девојката, дека го убиле тетинот и со него нахраниле кучиња. Тие луѓе стоеја покрај мене- вели Родман, кој што е познат по своето крајно ексцентрично и бизарно однесување, кое што го практикува и во самата Кореја.
Новинарката во неколку наврати го прашува да објасни што всушност зборува, а Родман и рече дека тетинот стоел покрај него.
Инаку тетинот важеше за ментор на Ким, а долга низа години беше и втор човек во тек на режимот на неговиот покоен татко Ким Џонг Ил. Според известувањето на државните медиуми, тој е убиен на 12-ти декември минатата година, поради „корумпиранст и предавство“.
Во август минатата година се пишуваше и дека поранешната девојка на Ким, поп пејачката Хјон Сонг Вол е убиена со пиштол. Но Родман инсистира дека тоа всушност не е вистина.
Тој во неколку наврати беше во Северна Кореја каде што организираше кошаркарски натпревари, со неколкумина свои поранешни колеги од НБА. Последен пат таму беше за роденденот на лидерот и во стил на Мерлин Монро му ја испеа песната „Среќен роденден“. Во интервјуто, меѓу другото тој вели дека Ким многу сака да разговара со американскиот претседател Барак Обама.
-Често зборува дека не сака никого да бомбардира, дека не сака да убива Американци- вели тој и заклучува дека Ким, кој овие денови Америка ја нарече пекол, впрочем ги обожава Американците.
Тој сугерира дека Ким работи за својот народ и дека неговите правила се попрогресивни од татко му и дедо му.
Е. Г.