Во голем напад со дронови во текот на ноќта беа погодени повеќе локации во Русија, меѓу кои и логистички центри на интернет-продавницата Ozon.
Во Краснодар, при пад на остатоци од дрон врз приватен детски центар, загинаа две деца, а уште девет лица се повредени, меѓу кои седум деца, соопшти гувернерот на Краснодарскиот крај, Венијамин Кондратјев.
OZON logistics centers are reportedly on fire in Nevinnomyssk in Russia’s Stavropol region, near Enem in Adygea, and in Krasnodar following drone attacks. pic.twitter.com/v26pBtRJlU
— Anton Gerashchenko (@Gerashchenko_en) August 24, 2026
Тој наведе дека остатоци од дронови паднале и врз станбени згради и објекти во изградба, додека на неколку магацини избувнале пожари.
Од Ozon потврдија дека пожар избувнал во нивниот логистички центар во Краснодар. Вработените биле евакуирани и, според првичните информации, нема повредени меѓу нив.
Според руски и украински канали кои ги следат нападите, во текот на ноќта биле погодени повеќе логистички центри на Ozon.
Во близина на местото Енем, во руската Република Адигеја, бил погоден логистички центар на компанијата, по што избувнал пожар.
Пожар бил пријавен и во големиот логистички центар на Ozon во Невиномиск, во Ставрополскиот крај. Гувернерот Владимир Владимиров потврди дека градската индустриска зона била цел на напад со дронови и дека руската противвоздушна одбрана соборила дел од нив.
Според непотврдени информации објавени на Телеграм, погоден бил и објект на Ozon во Дагестан.
Проукраинскиот канал „Crimean Wind“ објави дека по четири удари избувнал пожар и на локација на радарска единица на окупираниот Крим. Овие информации засега не се независно потврдени.
Нападите се случуваат на украинскиот Ден на независноста, кога Украина одбележува 35 години од прогласувањето независност од Советскиот Сојуз.
Ukrainian attack drones continue to hit Russian warehouses in Krasnodar tonight, with an Ozon e-commerce distribution center in Enem, one of the largest in the region, engulfed in flames. pic.twitter.com/nUgZ7tlzTA
— OSINTtechnical (@Osinttechnical) August 23, 2026
Ова е трета ноќ по ред во која се пријавуваат напади врз логистичката инфраструктура на Ozon.
Објекти на компанијата беа погодени на 22 август во Самарската област, а во ноќта на 23 август бил нападнат објект во Оренбург.
Украина во последните недели ги засили нападите врз магацини и логистички центри на руска територија. Меѓу метите беше и Wildberries, најголемиот руски интернет-продавач.
Целта на ваквите напади, според „Ројтерс“, е последиците од војната да се пренесат и врз руската логистичка и економска инфраструктура.