Пет лица загинаа, а илјадници се евакуирани во јужна Германија по обилните дождови кои предизвикаа поплави. Во Баварија две лица и еден пожарникар ги загубија животите, изјави за Си-Ен-Ен Јирген Вајс од Здружението на пожарникари во Баварија. Едниот цивил бил однесен од порој додека бил во својот автомобил, додека причината за смртта на другиот се уште не е позната. Пожарникарот загинал при спасувањето, кога чамецот се превртел.
Две лица загинаа во провинцијата Баден-Виртемберг. Властите веруваат дека тие загинале додека се обидувале да испумпаат вода од нивниот подрум. Шест лица и еден 22-годишен пожарникар се уште се водат како исчезнати. Вчера наутро нивото на Дунав во градот Пасау достигна 9,6 метри, што е речиси двојно повеќе од нормалното ниво за овој период од годината.
Пасау е познат како град на три реки (германски: Dreiflüssestadt) и се наоѓа на реката Дунав и на сливот на реките Инна и Илза. Има околу 50.000 жители.
Градските власти поради поплавите го прекинаа сообраќајот и ги испразнија подземните паркинзи. Од фотографиите се гледа дека целиот централен дел на градот е под вода. Многу улици се практично непроодни, односно по нив пловат само чамци на спасувачки тимови.