Најмалку 375 луѓе загинаа, повеќе од 500 се повредени, а 56 се водат како исчезнати, по тајфунот Раи, кој ги погоди Филипините. Околу 380.000 луѓе ја напуштија областа поради невремето, кое го погоди архипелагот во четвртокот. Преживеаните бараат залихи на вода и храна, пишува Гардијан.
Тајфунот корнеше покриви и дрвја, уништи куќи и поплави помали населби и села.
Во голем дел од Филипините нема струја и вода, а полицијата, војската, пожарникарите и крајбрежната стража се на терен, каде делат храна, вода и им помагаат на повредените.
Граѓаните изразија незадоволство поради тоа што ниту еден политичар не се појавил и не се обидел да помогне: Редовно плаќавме даноци и сега никој нема да ни помогне.
Раи ги погоди Филипините доцна во сезоната на тајфуните: повеќето циклони се развиваат помеѓу јули и октомври.
Научниците долго време предупредуваат дека тајфуните стануваат помоќни и се зајакнуваат побрзо, бидејќи светот станува потопол поради климатските промени предизвикани од луѓето.