Најмалку 22 питомци на украинска воена воздухопловна академија загинаа вечерва кога транспортниот авион Антонов-26 со кој се превезувале, се урна при слетување, а потоа се запали.
Двајца патници во авионот ја преживеале несреќата, но се во критична состојба, а четворица се водат како исчезнати, соопштија спасувачките служби.
Авионот се урна при обид да слета на аеродромот во Чугуив во близина на Харков, околу 400 километри источно од главниот град Киев.
Според првичните извештаи, авионот превезувал студенти на државната воздухопловна академија, а екипажот бил составен од припадници на армијата.
Засега нема информации околу причините за несреќата.