Американската војска соопшти дека рано утринава по грешка соборила еден од сопствените борбени авиони над Црвеното Море, принудувајќи ги двајцата пилоти да се катапултираат. Двајцата беа спасени, еден со полесни повреди, по „очигледен пријателски инцидент“, кој се истражува, се вели во соопштението на американската Централна команда.
Ловецот бил Ф/А-18 Хорнет кој летал од носачот на авиони Хари С. Труман. Еден од придружните бродови, ракетниот крстосувач Гетисбург, „испука и го погоди“ авионот по грешка, се вели во соопштението.
Црвеното Море веќе некое време е жариште на воени активности, додека американските сили се борат против Хутите поддржани од Иран во Јемен, кои извршија напади врз бродови во регионот. Американската војска објави дека во саботата пукала кон беспилотни летала и проектили на Хутите над Црвеното Море и дека ги нападнала командните и контролните пунктови и ракетните складишта во Сана.