Со обилни врнежи од снег денеска беа зафатени делови на Велика Британија, кои предизвикаа застои и блокади во копнениот и воздушниот сообраќај.
Издадено е жолто предупредување од страна на британската метеоролошка служба од можни нови снежни врнежи, пред се во централните делови на Англија и во северен Велс.
Застои има на повеќе патни правци во земјата поради снегот, а доцнат или откажани се повеќе возови и авионски летови.
Во реонот на Сенибриџ во Велс има снежна покривка од 28 сантиметри, додека во Хај Вејкомб во близина на Лондон, наврнале 12 сантиметри снег.
Сите летови се откажани од лондонскиот аеродром „Станстед“ и од аеродромот во Бирмингем поради замрзнување на пистите, а во реонот на Лестер целосно беше блокиран сообраќајот на автопатот М1, кој го поврзува Лондон со североисточниот дел на Англија.
Британската железници информира дека поради снегот се регистрирани поголеми доцнења на над десет возови, во најголем дел во реонот на Бирмингем.