Британскиот премиер Кир Стармер ги поддржува напорите на американскиот претседател Доналд Трамп за прекин на војната во Украина, но Киев мора да биде дел од секој договор за прекин на борбите, изјави неговата портпаролка.
Во Украина постојат стравувања дека Трамп и рускиот претседател Владимир Путин би можеле да се обидат да ги диктираат условите за прекин на војната кога ќе се сретнат во Алјаска во петок.
Но, неколку европски сојузници на Киев денес повикаа Украина да биде директно вклучена во секој мировен договор.
„Не му веруваме на претседателот Путин, но ќе ја поддржиме Украина, претседателот Трамп и европските земји додека влегуваме во овие преговори“, изјави портпаролката на британскиот премиер за новинарите.
„Мирот мора да се гради со Украина, а не да ѝ се наметнува, и ние нема да наградуваме агресија или компромис за суверенитетот. Украина ќе одлучи за својата иднина, а ние ќе ја поддржуваме на секој чекор од патот.“