Генералите на американската армија ја изгубија довербата во американскиот министер за одбрана Пит Хегсет поради неговите јавни изјави, како и поради целосниот хаос во Пентагон под негово водство, објави „Вашингтон тајмс“.
Според весникот, Хегсет ја изгубил довербата и почитта на генералите поради неговата јавна „прекумерна самопромоција“ што е широко распространета и се смета за непрофесионална, како и поради кадровските поместувања на поранешниот телевизиски водител, што доведоа до невиден и опасен одлив на професионални луѓе од Пентагон.
Бројни високи офицери го опишаа говорот на Хегсет на 30 септември пред стотици генерали и адмирали собрани во базата на морнаричките сили Квантико во Вирџинија како пресвртница во начинот на кој неговиот стил на лидерство, став и целокупна компетентност се перцепираат во највисоките ешалони на американските вооружени сили.
Високи функционери го нарекоа говорот „срамен“ и толку театрален што беше „под нивото“.
„Беше огромно губење време. Ако некогаш нè имаше, нè изгуби“, изјави за „Вашингтон тајмс“ сегашен генерал на американската армија.
Одлуката на Хегсет да ги собере сите генерали на едно место, а потоа да им одржи говор, беше контроверзна од неколку причини.
Прво на сите, собирањето на американски генерали од целиот свет во Вирџинија дури се сметаше за потенцијален безбедносен ризик. Тоа може да предизвика и нестабилност во оние делови од светот каде што САД имаат одредено влијание преку своето воено присуство.
Од друга страна, говорот во кој Хегсет ги критикуваше војниците за нивните долги бради, зборуваше за „недостаток на дисциплина“, но и за слични бизарни изјави, очигледно доведе до целосен прекин на довербата помеѓу генералот и секретарот за војна. Покрај тоа, Хегсет веќе неколку месеци спроведува внатрешни истраги и кампања за затворање на Пентагон поради фактот што пораките од групен разговор на апликацијата Signal во кои се дискутираа американските напади врз Јемен беа објавени во јавноста.
Преку новите правила, Хегсет во суштина ги исклучи традиционалните медиуми од Пентагон, отпушти голем број негови соработници и спроведе внатрешни пребарувања за луѓе што ги сметаше за виновни.Без оглед на сите овие околности, американскиот претседател Доналд Трамп јавно го фали Хегсет и јасно е дека тој нема да биде заменет.