Разрешениот каталонски премиер, Карлес Пуџдемон, не се врати во Барселона од Брисел, oбјави шпанскиот весник „Вангардија“. Во каталонската престолнина пристигнале само неговите поранешни советници, наведува весникот.
Весникот „Вангардија“, повикувајќи се на изјави на патници кои тврделе дека Пуџдемон е во нивниот авион, објави дека тој од Брисел се враќа во Барселона. Но, во Барселона пристигнале само поранешниот претседател на Каталонскиот совет за внатрешни работи, Јоаким Форн, и поранешната советничка за труд, социјални работи и семејство, Долорес Баша.
– Авионот веќе слета на аеродромот Ел Прат во Барселона. Во авионот сепак не се наоѓаше Карлес Пуџдемон, иако патници од истиот лет ги уверија новинарите од „Вангардија” во спротивното, напиша весникот.
Против Пуџдемон и неговите соработници е покренато обвинение за поттикнување на бунт, а секој од нив може да добие до 30 години затвор. Неодамна, Пуџдемон рече дека е подготвен да оди во затвор.