Закон, со кој се забранува пушење во затворени јавни простори, беше изгласан денеска во Домот на делегатите во романскиот Парламент, пренесува БТА.
Предлогот беше усвоен со 164 гласа „за”, 20 гласа „против” и 26 воздржани и ќе стапи во сила откако ќе го потпише претседателот Клаус Јоханис.
Законот предвидува целосна забрана на пушењето во ресторани, барови, пабови, како и други затворени простори, како работни места, здравствени и образовни институции – како приватни, така и државни. Освен тоа пушењето се забранува и на места наменети за детска игра.
Затворените простори, во кои и натаму ќе биде дозволено пушење се специјално предвидените за таа цел простории кои треба да исполнуваат неколку услови, вклучително и да бидат опремени со соодветни системи за вентилација и пепелници. Пушењето останува дозволено и во затворските ќелии, пишува романскиот сајт „Зиаре“
За непочитување на забраната, законот предвидува казни помеѓу 100 и 500 леи (еврото се разменува за 4,50 леи) за физички лица и меѓу 5000 и 15 000 леи за правни лица, а баровите и клубовите може да бидат затворени, ако се утврди дека не ја почитуваат регулативата.