Министрите за надворешни работи на земјите-членки на Европската унија во главниот град на Летонија, Рига, втор ден разговараат за војната во источна Украина.
Состанокот на министрите од 28 земји-членки доаѓа во период на зголемена тензија меѓу Европската унија и Русија за поддршката на Москва за сепаратистите во Украина, објави Радио Слободна Европа. Спроведувањето на прекинот на огнот договорен во Минск е високо на агедната на состанокот во Рига.
Русија и Германија вчера побараа од ОБСЕ, која е задолжена за мониторинг на прекинот на огнот во источниот дел на Украина, двојно да го зголеми бројот на своите набљудувачи на 1.000, соопшти руското Министерство за надворешни работи.
Во соопштението се наведува дека министрите за надворешни работи на Русија и на Германија, Сергеј Лавров и Франк-Валтер Штајнмаер се заложиле за интензивирање на напорите на ОБСЕ за надгледување на слабиот мир.
Мисијата на ОБСЕ моментно брои само 450 луѓе. Организацијата треба наскоро да одлучи дали ќе го обнови својот мандат, кој истекува на 23 март и дали бројот на набљудувачи на терен треба да се зголеми.