Руски воен хеликоптер Ка-27 е соборен на окупираниот Крим, соопшти портпаролот на украинската морнарица Дмитро Плетенчук. „Рускиот Ка-27 беше соборен на Крим, бараше нешто и го најде“, напиша Плетенчук на Фејсбук.
Плетенчук не објави дополнителни информации за соборувањето на хеликоптерот. Ка-27 е поморски повеќенаменски хеликоптер од советската ера. Распореден е на бродови од различни класи. Може да детектира модерни подморници и површински цели, да пренесува информации за нив на бродски и крајбрежни станици и да ги нападне.
Руското Министерство за одбрана соопшти дека всушност се работи за хеликоптер Ми-24 кој сам се урна. „На 10 април 2024 година, околу 06:00 часот по московско време, хеликоптерот Ми-24 се урна додека вршеше редовен лет над Црното Море во близина на западниот брег на Република Крим“, се вели во соопштението.
„Прелиминарната причина за несреќата е дефект на леталото. Службата за пребарување и спасување работи на местото на несреќата“, се додава.