За време на преговорите во Саудиска Арабија, руските претставници одбија да разговараат за запирање на нападите врз цивилната инфраструктура, изјави заменик-шефот на претседателската администрација на Украина Ихор Жовква во интервју за Укринформ.
„Конкретно го поставивме прашањето за цивилната инфраструктура – станбени згради, училишта, градинки и слично. Што направи Русија? Во текот на преговорите, според информациите од американската страна, тие директно одбиле да разговараат за цивилната инфраструктура, велејќи и на американската делегација дека немаат мандат да го решаваат ова прашање“, рече Жовква.
Тој истакна дека Украина инсистира на заштита на цивилните објекти од напади.
„Сепак, гледаме дека Русија наместо тоа го засили гранатирањето на нашите градови и јавни објекти. Сите сте сведоци на неодамнешните напади по наводната „тишина во воздухот“ што Русија тврди дека ја почитува. Нападите на Кривој Рог и Суми докажуваат дека Русите немаат намера да ги запрат нивните напади – барем не врз цивили“, рече Жовква.
Состанокот во Ријад резултираше со пет клучни договори меѓу Украина и САД, вклучително и обезбедување безбедна пловидба во Црното Море, забрана за напади врз енергетската инфраструктура во Русија и Украина, дополнителни напори за размена на затвореници и враќање на децата киднапирани од Русија.