Украинските трупи, кои се во дефанзива со месеци, наскоро ќе започнат контранапад бидејќи се чини дека офанзивата на Русија слабее, рече командантот на украинските копнени сили Олександр Сирски, но претседателот Володимир Зеленски предупреди дека без побрзо снабдување со оружје, војната може да се одолговлекува со години.
Зеленски рече дека Европа мора да го зголеми и забрза снабдувањето со оружје, повторно повикувајќи на набавка на ракети со долг дострел, муниција и модерни авиони и да воведе дополнителни санкции кон Русија. „Ако Европа чека, злото може да има време да се прегрупира и да се подготви за години војна“, рече очигледно фрустрираниот Зеленски во видео обраќањето до лидерите на Европската унија во четвртокот.
На самитот на ЕУ, лидерите го одобрија планот договорен од министрите за надворешни работи во понеделникот за испраќање еден милион артилериски гранати во Украина во текот на годината. Тие, исто така, разговараа за глобалното снабдување со храна и санкциите против Русија.
Велика Британија вети дека ќе испорача оклопна муниција што содржи осиромашен ураниум за да помогне во уништувањето на руските тенкови, потег што претседателот Владимир Путин рече дека ќе ја принуди Русија да одговори бидејќи оружјето има „нуклеарна компонента“.
Словачка во четвртокот објави дека ги испорачала првите четири ветени авиони МиГ-29 на Украина, а останатите ќе бидат испорачани за неколку недели.
Врховниот командант на копнените сили на Украина, Олександр Сирски, рече дека неговите сили наскоро ќе започнат контраофанзива откако ќе ја издржат бруталната зимска кампања на Русија. Тој рече дека руските платеници од групата Вагнер, кои се на првата линија на рускиот напад на источна и јужна Украина, „значително ја изгубиле силата“.
„Ќе ја искористиме оваа можност многу брзо, како што направивме во минатото во близина на Киев, Харков, Балаклија и Купјанск“, рече тој, наведувајќи ги украинските контраофанзиви минатата година кои повторно зазедоа делови од земјата.
Официјална Москва засега не ги коментираше изјавите дека нејзините сили во Бахмут го губат моментумот, но шефот на Вагнер, Евгениј Пригожин, предупреди на украински контранапад во последните денови. Во понеделникот Пригожин објави писмо до рускиот министер за одбрана Сергеј Шојгу, во кое се вели дека Украина има намера да ги отсече силите на Вагнер од редовните руски трупи.
Забавувањето од страна на Русија во Бахмут може да значи дека таа ги пренасочува своите војници и ресурси во други области. Велика Британија во четвртокот соопшти дека руските трупи напредувале уште на север овој месец, делумно враќајќи ја контролата врз приодите кон градот Кремина. Интензивни битки се воделе и на југ.
Секоја промена во динамиката на војната во Бахмут, доколку се потврди, би била важна со оглед на симболичното значење на градот како фокус на руската офанзива и обемот на загубите на двете страни во најкрвавата битка во Европа по Втората светска војна.
На теренот во Украина, линиите на фронтот во голема мера се замрзнати од ноември. Пред неколку недели се чинеше дека Украина најверојатно ќе се повлече од Бахмут, но реши да ја продолжи борбата. Претходно во четвртокот, Зеленски ја продолжи својата турнеја низ регионите на фронтот, посетувајќи го Херсон еден ден по средбата со војниците во близина на Бахмут.