Висок претставник на забранетото исламистичко движење во Египет „Муслиманско братство“ бил убиен вчера во престрелка со полицијата, соопшти египетското Министерство за внтарешни работи.
Шеесет и едно годишниот Мохамед Камал бил одговорен за „военото крило“ на организацијата. Тој бил убиен заедно со друг лидер на „Муслиманско братство“, Јасер Шехата.
Полицијата извршила упад во стан во Каиро откако добила информација дека бил користен од „Муслиманско братство“ како седиште.
Камал бил осуден во отсуство на доживотен затвор, а Шехата на 10 години затворска казна.
Египетскиот претседател Абдел Фатах ас Сиси ги презема најжестоките мерки против исламистите во современата историја на земјата, откако во јули 2013 година го собори од власт својот претходник Мохамед Морси од „Муслиманско братство“.