Млад приврзаник на идеологијата на белата надмоќ над црното население денеска е осуден на доживотен затвор без можност за условно ослободување за убиството на десет Афроамериканци во 2022 година во Бафало, во западната држава Њујорк.
Пејтон Гендрон (19) се изјасни за виновен по вкупно 15 точки од обвинението, вклучително и убиство и тероризам од омраза за масовното пукање во Бафало на 14 мај.
Откако неколку роднини на убиените зборуваа за нападот, Гендрон им се извини на семејствата на жртвите, велејќи дека сега не може да поверува што направил и се надева дека неговото злосторство нема да ги мотивира другите да го следат неговиот пример. Тоа е еден од најсмртоносните напади извршени во последниве години во САД.
„Многу ми е жал за целата болка што им ја предизвикав на жртвите и на семејствата“, рече Гендрон.
„Не можам да изразам колку жалам за сите одлуки што доведоа до акциите на 14 мај. Направив страшна работа тој ден. Пукав и убив луѓе бидејќи беа црнци“, додаде тој.
Во пресрет на изрекувањето на пресудата, член на семејството на еден од убиените сакаше да го удри Гендрон, но полицијата спречи поголем инцидент.