Руската полиција приведе во Санкт Петербург, околу 300 муслимани од неколку земји, осомничени дека би можеле да претставуваат терористичка закана.
“Најмалку 270 лица, вклучувајќи и државјани на Узбекистан, Таџикистан, Азербејџан, како и граѓани на Северен Кавказ, еден Египќанец и еден авганистанец, приведени се, за да се испита нивната евентуална вмешаност во терористички активности”, се вели во соопштението на полицијата.
Федералната служба за безбедност (ФСБ) и полицијата, во петокот извршиле заедничка операција на централниот пазар “Апраскин двор”, место каде што муслиманите работаат и се молат.
Властите не објавија дали некои од уапсените се ослободени подоцна од притвор, но службите за имиграција велат дека, барем 10 од нив ќе бидат депортирани.
Еден од уапсените, 25-годишниот Мурат Сарбашев од кавкаската република Кабардино-Балкарија, е осомничен дека на интернет поставувал текстови со екстремистичка содржина и видео снимки од терористички напади, соопштија инспекторите.