Доколку Ирска не е задоволна од понудата на Лондон за статусот на границата кон Северна Ирска, ЕУ ќе го отфрли барањето за преговори за транзицискиот период по излегувањето на Велика Британија од Унијата и за иднината на трговскиот пакт, изјави претседателот на Европскиот совет Доналд Туск.
– Пред да им ги предложам на европските лидери насоките за транзицискиот период и идните односи со Обединетото Кралство, прво ќе се консултирам со ирскиот премиер Лео Варадкар, за тоа дали британскиот предлог е прифатлив за Владата на Ирска. Ќе бидам многу јасен: Ако предлогот на Обединетото Кралство не е прифатлив за Ирска, тој нема да биде прифатлив ниту за ЕУ, нагласи Туск по средбата со Варадкар.
Според ирскиот премиер, Велика Британија треба да понуди веродостојни, конкретни и практични решенија кои ќе гарантираат дека нема да има „тврда“ граница, безразлика на исходот од преговорите со ЕУ.
Крајниот рок до кога Лондон треба да предложи решенија за границата е 4 декември. Прашањето за границата е една од трите теми кои треба да бидат уредени пред да започне втората фаза од преговорите за Брегизт.