Американскиот претседател Доналд Трамп изјави дека не сака сомалиски имигранти во САД, велејќи им да „се вратат од каде што дошле“ затоа што „нивната земја не е добра со причина“. Острите коментари дојдоа по медиумските извештаи дека имиграциските власти планираат голема операција насочена кон сомалиската заедница во Минесота, објави Би-Би-Си.
„Не ги сакам во нашата земја, ќе бидам искрен со вас“, рече Трамп за време на вчерашниот состанок на кабинетот. Тој додаде дека САД ќе „тргнат по погрешен пат ако продолжиме да примаме ѓубре да влезе во нашата земја“.
Неговите изјави, дадени на крајот од повеќечасовниот телевизиски состанок, беа недвосмислени: „Не ги сакам во нашата земја. Ќе бидам искрен со вас, во ред. Некои луѓе ќе речат: „О, тоа не е политички коректно“. Не ми е гајле. Не ги сакам во нашата земја“. „Со Сомалија, која е едвај земја, знаете, тие немаат ништо. Тие само се убиваат едни со други. Нема структура“, тврдеше Трамп.
Потоа претседателот го нападна претставникот Илхан Омар, првиот сомалиско-американец избран во Конгресот, со кого и претходно се судрил.
„Секогаш ја гледам“, рече тој, додавајќи дека Омар „ги мрази сите. И мислам дека е некомпетентна личност“.
Омар возврати на социјалните мрежи: „Неговата опсесија со мене е ужасна. Се надевам дека ќе ја добие помошта што очајно му е потребна“.
Американската Служба за имиграција и царина (ICE) доби наредба од администрацијата на Трамп да ги таргетира недокументираните сомалиски имигранти во Минеаполис и Сент Пол, познати како градовите близнаци, изјави за CBS News лице запознаено со планот. Се очекува операцијата, која треба да започне оваа недела, да вклучи стотици луѓе.
Портпаролката на Министерството за внатрешна безбедност, кое го надгледува ICE, одби да коментира за планираните акции, но негираше дека некој ќе биде цел на напади врз основа на раса.
„Секој ден, ICE ги спроведува законите на земјата низ целата земја“, рече помошничката секретарка Триша Меклафлин и додаде „Она што го прави некого цел на ICE не е неговата раса или етничка припадност, туку фактот дека се наоѓа во земјата нелегално“.