Американскиот претседател Доналд Трамп денес го опиша одговорот на Иран на предлогот на Вашингтон за прекин на војната како целосно неприфатлив.
– Тукушто го прочитав одговорот од таканаречените ирански „претставници“. Не ми се допаѓа – целосно неприфатлив! Ви благодарам за вниманието кон ова прашање, напиша Трамп на својот профил на Твитер.
Претходно, Пакистан потврди дека добил одговор од Иран на предлогот на Соединетите Американски Држави за прекин на војната и го проследил до Вашингтон. Неименуван ирански функционер изјави за Ал Џезира дека во својот одговор, Техеран изразил подготвеност за разговори за прекин на непријателствата во регионот, вклучително и во Либан, за нуклеарната програма, санкциите и безбедноста на Ормутскиот теснец, заедно со барање за јасни меѓународни гаранции и целосно укинување на сите рестриктивни мерки.
Според изворот, иранскиот одговор предвидува и разговори за постигнување договор со Соединетите Американски Држави, инсистирајќи на целосно укинување на сите санкции.
Се вели дека Техеран бара јасно дефиниран механизам за укинување на санкциите што би го гарантирала меѓународната заедница, како и цврсти меѓународни гаранции за спроведување на евентуален договор со Вашингтон.
Во одговорот, исто така, се предлага разгледување на поширока регионална рамка, вклучувајќи ги безбедносните прашања во Ормутскиот теснец и нуклеарната програма на Иран, со оценка дека преговорите треба да се засноваат на „врховни национални интереси“ и консултации со земјите во регионот.
Предложениот американски меморандум, кој содржи 14 точки, вклучува обврска на Иран за мораториум за збогатување на ураниум, додека постепено се укинуваат санкциите на САД и се ослободуваат замрзнатите ирански средства.