Американскиот претседател Доналд Трамп изјави во понеделник дека ќе има долг разговор со кинескиот претседател Си Џинпинг за војната со Иран за време на неговата претстојна посета на Кина и додаде дека не мисли дека му е потребна кинеска помош.
– Не мислам дека ни е потребна никаква помош со Иран. Победуваме на еден или друг начин, мирно или на друг начин, им рече Трамп на новинарите пред да замине за Кина, објави Ројтерс.
Трамп додаде дека состаноците ќе се одржат во Пекинг во четврток и петок, но подоцна рече дека Иран „не е главна тема“ бидејќи ситуацијата е „во голема мера под контрола“.
Лидерите на двете најголеми економии во светот ќе се сретнат за прв пат по повеќе од шест месеци во обид да ги стабилизираат односите кои се затегнати поради трговските спорови, војната меѓу САД и Израел против Иран и други отворени прашања, објави Ројтерс. Трамп патува во Кина во време на нерешен конфликт во Иран и застој во дипломатските преговори, додека Кина одржува врски со Иран и останува главен купувач на неговата нафта.
Американскиот претседател претходно го повика Пекинг да го искористи своето влијание за да го охрабри Техеран да го прекине конфликтот и да постигне договор со Вашингтон.