Американскиот претседател Доналд Трамп објави дека ја отстранил Лиза Кук, гувернерка на Федералните резерви (ФЕД), од нејзината позиција, обвинувајќи ја за извршување хипотекарна измама.
Во писмо до Кук, Трамп рече дека има „доволно докази“ дека Кук дала лажни изјави во хипотекарните договори, а Федералната агенција за финансирање на домување поднесе барање до Министерството за правда за отстранување на гувернерката.
„Најмалку, предметното однесување покажува вид небрежност во финансиските трансакции што ја доведува во прашање вашата компетентност и доверливост како финансиски регулатор“, се наведува во писмото.
Трамп додаде дека отстранувањето на Кук, првата Афроамериканка на оваа позиција, е неопходно за спроведување на законот, објави ABC.
Кук рече дека Трамп „нема овластување“ да ја отпушти и дека таа ќе продолжи да ги извршува своите должности, а нејзиниот адвокат, исто така, забележа дека се во тек правни дејствија, велејќи дека ќе преземат „сите потребни мерки“ за да го блокираат „обидот за незаконско дејствување“ на Трамп.
Минатата недела, Трамп ја повика Кук да поднесе оставка на истиот ден кога Бил Пулт, директор на Федералната агенција за финансирање на домување, објави дел од писмото од 15 август до главниот обвинител на САД, Пам Бонди, во кое ја обвинува Кук за фалсификување на банкарски евиденции и евиденција за недвижности за да добие поповолни услови за кредит, „потенцијално правејќи хипотекарна измама“, се вели во писмото.
Во изјава дадена на ABC News минатата недела, Кук рече дека дознала за писмото на Пулт од медиумите, во кое таа бара кривично гонење за апликација за хипотека што датира од претходната работа во Федералните резерви.
Кук беше номинирана во одборот на директори во 2022 година од поранешниот американски претседател Џо Бајден, а нејзиниот мандат трае до јануари 2038 година.