Американскиот претседател Доналд Трамп денес објави дека наредил значително намалување на заедничките воени вежби меѓу САД и Јужна Кореја, велејќи дека тие испраќаат „тотално несоодветен и непријателски сигнал“ до Северна Кореја.
Трамп ја оправда одлуката со, како што изјави, неговиот „многу добар однос“ со севернокорејскиот лидер Ким Џонг Ун.
„Не сум задоволен од фактот што САД одамна се согласија да учествуваат во заеднички воени вежби со Јужна Кореја“, напиша Трамп на социјалната мрежа Truth Social.
Според него, вежбите „не само што се скапи“, при што голем дел од трошоците ги плаќаат САД, туку испраќаат и сигнал кој е „тотално несоодветен и непријателски“ кон земја која, како што тврди, била неагресивна и фер за време на неговото претседателствување.
„Затоа, со оглед на фактот дека е предоцна да се откажат вежбите, му наложив на секретарот за војна Пит Хегсет значително да ги намали заедничките воени вежби“, рече Трамп.
Тој додаде дека неодамна го прашал претседателот на Јужна Кореја дали таа земја би сакала да им се придружи на САД во денуклеаризацијата на Иран.
„Тие рекоа: „Не, благодарам!““, напиша Трамп.