Американскиот претседател Доналд Трамп објави на својата социјална мрежа Truth Social дека неговата средба со украинскиот претседател Володимир Зеленски била „многу интересна и срдечна“.
Трамп изјави дека му рекол на Зеленски, како што претходно му рекол на Владимир Путин, дека е „време да се запре убивањето и да се постигне договор“.
„Доста е со крвопролевањето. Треба да престане таму каде што е. Двајцата нека прогласат победа и нека одлучи историјата! Крај на пукањето, крај на смртните случаи, крај на огромните и неодржливи трошоци. Ова е војна што никогаш немаше да се случи ако јас бев претседател“, напиша Трамп.
„Илјадници луѓе се убиваат секоја недела – доста, вратете се кај вашите семејства во мир!“, рече американскиот претседател.
Трамп замина за Флорида по средбата и не им се обрати на новинарите. Тој отиде во своето приватно одморалиште, каде што ќе го помине викендот.