Уставниот суд на Тајланд ја разреши Паетонгтарн Шинаватра од премиерската функција, пресудувајќи дека како лидер на земјата ги прекршила уставните правила за етика во телефонскиот разговор со претседателот на камбоџанскиот Сенат Хун Сен.
Оваа пресуда, која најавува нов период на нестабилност во земјата, значи дека таа веднаш ја губи функцијата, која ја извршуваше околу една година. 39-годишната жена веќе беше суспендирана од своите должности на 1 јули откако беше објавена снимка од нејзиниот телефонски разговор со Хун Сен, во која тие разговараа за тлеечкиот граничен спор меѓу соседните земји.
Критичарите ја обвинија дека не ги заштитила интересите на Тајланд за време на повикот, во кој таа му се обрати на Хун Сен со „вујко“ и му рече дека ако има нешто што тој го сака, таа ќе „се погрижи за тоа“. Таа, исто така, критикуваше висок тајландски воен командант.
Паетонгтарн, ќерка на милијардерот и поранешен тајландски лидер Таксин Шинаватра, се извини за своите коментари, опишувајќи ги како преговарачка тактика. Сепак, протечениот разговор создаде голема политичка криза за нејзината влада, само една година откако таа ја презеде функцијата.
Коалицискиот партнер ја напушти нејзината влада во јуни, оставајќи ја со тесно мнозинство, додека илјадници демонстранти излегоа на улиците на Бангкок, барајќи нејзина оставка.
Случајот од петокот произлезе од петицијата поднесена во јуни од група сенатори кои бараа нејзино отстранување од функцијата, обвинувајќи ја за недостаток на интегритет и кршење на етичките стандарди.
Повикот не само што ја фрли нејзината влада во хаос, туку означи и значително влошување на тајландско-камбоџанските односи. Неколку недели откако беше протечена снимката, граничниот спор ескалираше во петдневен конфликт во кој загинаа десетици луѓе, а стотици илјади беа раселени.
Гневот поради телефонскиот повик и справувањето на Шинаватра со граничната криза е засилен од перцепцијата дека личниот однос на нејзиното семејство со Хун Сен ги поткопува и се меша со националните интереси на Тајланд.
Хун Сен ја објави целосната верзија на видеото, кој исто така се закани дека ќе објави дополнителни компромитирачки информации за таткото на Шинаватра, Таксин. Познато е дека Хун Сен бил стар пријател на Таскин, иако, од непознати причини, сега се во конфликт.
Петонгтарн е четвртиот член на нејзиното семејство чиј мандат е скратен со воен удар или судска одлука. Таксин беше соборен со воен удар во 2006 година, додека во 2008 година зетот на Таксин, Сомчаи Вонгсават, кој кратко време беше премиер, исто така беше принуден да се повлече со судска одлука. Во 2014 година, сестрата на Таксин, Јинглук, беше соборена со судска одлука, а потоа и со воен удар.
Семејството кое е во криза е во децениска борба за власт со воениот ројалистички естаблишмент на Тајланд, иако неговиот опстанок е загрозен и од намалената поддршка кај гласачите.