Велика Британија формално ќе признае палестинска држава овој викенд, откако американскиот претседател Доналд Трамп, кој се противи на потегот, ќе ја напушти земјата по државната посета, објави денес „Тајмс“, повикувајќи се на извори.
„Тајмс“ објави дека Велика Британија ќе ја објави својата одлука за признавање на државата Палестина откако Трамп ќе се врати во Вашингтон во четврток.
Британскиот премиер Кир Стармер претходно изјави дека Велика Британија ќе ја признае државата Палестина на Генералното собрание на Обединетите нации следната недела, освен ако Израел не преземе суштински чекори за ублажување на ситуацијата во Газа.
Трамп во јули изјави дека нема да има ништо против Велика Британија да ја признае Палестина, по што САД се спротивставија на слични најави од други европски сојузници. Трамп моментално е во официјална посета на Велика Британија, негова прва на функцијата.
Трамп пристигна во Лондон во вторник вечерта, велејќи дека му се допаѓа што е назад во Велика Британија, која ја нарече „многу посебно место“, дека кралот Чарлс е негов долгогодишен пријател и многу го почитува, и дека поканата да дојде во замокот Виндзор е „исклучително голема чест“. Протести против американскиот претседател беа одржани пред замокот Виндзор за време на посетата на Трамп.