Настаните од изминатата недела јасно покажуваат дека европските лидери, и покрај нивните напори, речиси и да немаат никакво влијание врз американскиот претседател Доналд Трамп, кој продолжи остро да ги критикува, пишува „Тајм“.
Според авторот, мировниот план презентиран од американската администрација претставува фактичка капитулација пред рускиот претседател Владимир Путин, додека Европа е целосно маргинализирана во овие процеси.
Како што е објавено, Трамп целосно ги исклучил европските партнери од преговарачката рамка за Украина, оставајќи им минимален простор за маневрирање за да влијаат на клучните одлуки. Во интервју за „Политико“, американскиот претседател ја обвини Европа за пасивност, нагласувајќи дека „само зборува за Украина, но не прави ништо“ за да придонесе за решавање на конфликтот.
Во статијата на „Тајмс“ се наведува дека европските лидери во моментов се во исклучително неповолна позиција: под притисок од ситуацијата на фронтот во Украина, соочени со чести руски упади во воздушниот простор и со забележително затоплување на односите меѓу Белата куќа и Кремљ, тие се принудени да „јаваат два коња истовремено“, обидувајќи се да не ја изгубат рамнотежата. „Судбината на Европа повеќе не е во нејзини раце“, заклучува анализата.
Иако во истото интервју рече дека Европа „нема непријатели“ и дека ги цени локалните лидери, Трамп оцени дека во многу аспекти тие „не се дораснати за работата“. Според него, европските политички елити дејствуваат „слабо“ и честопати дури и не ги разбираат сопствените потези, што, како што сугерира, ги прави неспособни да влијаат врз глобалните процеси што ја одредуваат иднината на континентот.