Моќниот, но бавен тајфун „Канун“, пропратен со силен ветер, оштети далноводи во јапонската префектура Окинава, популарна туристичка дестинација и остави околу 200.000 домаќинства без струја, а досега е забележан еден загинат и 11 повредени.
Еден човек кој бил заробен под урната гаража набргу потоа починал, се наведува во соопштението на Агенцијата за борба против пожари и природни катастрофи, пренесува Ројтерс.
Речиси 700.000 жители на оваа префектура, која се наоѓа на околу 1.600 километри југозападно од јапонскиот главен град Токио, добија совети да се евакуираат поради бурата која се движи кон северозапад со брзина од десет километри на час, се наведува во соопштението на Јапонската метеоролошка агенција.